फक्त जीएसटी बिल अपलोड करा आणि एक कोटी मिळवा Mera Bill Mera Adhikar

केंद्र सरकारने किरकोळ आणि घाऊक व्यापाऱ्यांमध्ये जीएसटी बिलाला प्रोत्साहन देण्यासाठी एक नवीन योजना आणली आहे. 'मेरा बिल मेरा अधिकार' (Mera Bill Mera Adhikar) असे सरकारच्या या योजनेचे नाव आहे. या योजनेची घोषणा करताना केंद्र सरकारने सांगितले की, या माध्यमातून प्रत्येक तिमाहीत 1-1 कोटींची दोन बंपर बक्षिसे दिली जातील. त्याच बरोबर 10-10 हजार ते 10-10 लाख रुपयांपर्यंतची अनेक बक्षिसे देखील सहभागींना दिली जातील. ही योजना 1 सप्टेंबर 2023 पासून प्रायोगिक तत्त्वावर सुरू करण्यात येत आहे.

या विशेष योजनेची माहिती देताना अर्थ मंत्रालयाने म्हटले की, वस्तू आणि सेवा कर (जीएसटी) बिल दरमहा अपलोड करणाऱ्यांपैकी 800 लोकांना 10,000 रुपयांचे बक्षीस दिले जाईल. असे 10 भाग्यवान लोक असतील ज्यांना प्रत्येकी 10 लाख रुपयांचे बक्षीस दिले जाईल. बंपर बक्षीस तिमाही आधारावर काढले जाईल. या बंपर रिवॉर्डचा लाभ तिमाहीत अपलोड केलेल्या कोणत्याही बिलाच्या सहभागी व्यक्तीला दिला जाऊ शकतो.

मेरा बिल मेरा अधिकार' योजना खास ग्राहकांना जीएसटी बिले किंवा इनव्हॉइस गोळा करण्यासाठी प्रोत्साहित करण्यासाठी सुरू करण्यात आली आहे. अधिकाधिक जीएसटी इनव्हॉइस तयार झाल्यास व्यावसायिक कर चुकवू शकणार नाहीत. त्यामुळे सरकारच्या महसुलातही वाढ होईल. ही योजना आसाम, गुजरात, हरियाणा आणि केंद्रशासित प्रदेश पुद्दुचेरी, दादरा नगर हवेली आणि दमण आणि दीवसाठी सुरू करण्यात आली आहे. योजनेचा लाभ घेण्यासाठी अपलोड केलेल्या इनव्हॉइसमध्ये जीएसटीआयएन इनव्हॉइस क्रमांक, भरलेली रक्कम, कराची रक्कम, इनव्हॉइसची तारीख आणि राज्य आणि केंद्रशासित प्रदेशाचे नाव प्रविष्ट करणे आवश्यक आहे.

बिल कसे अपलोड करायचे

- सर्वप्रथम, तुम्हाला iOS आणि Android वरून 'My Bill My Right' ऍप  डाउनलोड करावे लागेल.
- याशिवाय तुम्ही web.merabill.gst.gov.in वर देखील भेट देऊ शकता.
- किमान 200 रुपयांचे बिल येथे अपलोड केले जाऊ शकते.
- लक्षात ठेवा की वापरकर्ता एका महिन्यात जास्तीत जास्त 25 बिले अपलोड करू शकतो.

अर्थ मंत्रालयाने माहिती दिली की, ज्या विजेत्यांना पारितोषिक मिळेल त्यांना पॅन नंबर, आधार कार्ड, बँक खात्याचे तपशील 'मेरा बिल मेरा अधिकार' अॅपवर अपलोड करावे लागतील. ही सर्व माहिती बक्षीस जाहीर झाल्यापासून 30 दिवसांच्या आत देणे आवश्यक आहे.